'n Afrikaanse blog oor kwiltwerk in al sy fasette.
Hier deel ek my kennis, liefde en passie vir my werk met mede kwilters.

Friday, January 11, 2019

2019 'n Skoon Bladsy

Ek is mal oor n nuwe jaar. Waar ander mense tou op gooi oor nuwe jaars voornemens omdat hulle nie daarby kan hou nie, het ek graag 'n klomp voornemens. Die nuwe jaar gee mens so 'n lekker geleentheid om oor te begin en te kyk of jy nie kan beter doen as die vorige jaar nie. Ek is n gereelde leser van Leo Baubata se Zenhabits en het weer die jaar by sy Sea change program in geskryf. By hom het ek geleer wat die geheim van die aanleer van nuwe gewoontes is.

Met sy hulp het ek oor die laaste 5 jaar my eetgewoontes verander, baie meer aktief geword en 'n wilde water swemmer geword wat al twee keer vanaf Robben Eiland na Big Bay in n gewone swembroek, geswem het.

Kwilt werk sal altyd my eerste liefde bly maar ek val baie keer vas met my projekte omdat ek 'n redelike besige lewe lei. Ek het ook hierdie groot slegte gewoonte en dit is om nuwe kwilts te begin en nie die ou goed klaar te maak nie. Hierdie gewoonte het begin toe ek  die melkery bestuur het en nie baie tyd vir my laslapwerk gehad het nie. Nuwe projekte het aan my energie gegee en dit was altyd makliker om iets nuut aan te pak as om goed klaar te maak.

Met my 60 projek wat ek so 2 jaar terug aangepak het, het ek myself uit gedaag om in die twee jaar rondom my 60 ste verjaardag, 60 kwilts te voltooi. Die maklikste sou wees om 60 half voltooide kwilts te voltooi, maar julle weet almal dit werk teen produktief as mens net aan ou goed "mag" werk. Ek het so 25 kwilts in die proses voltooi waarvan 'n hele paar nuwe kwilts was.

Ek het nie hierdie projek goed gedokumenteer nie en ook nie behoorlik foto'sgeneem van al my voltooide kwilts nie. 'n Hele klomp van hulle is weg gegee sonder dat ek behoorlik foto's geneem het.

Nou is daar 'n nuwe jaar en' n nuwe uitdaging. My vriendin Ronel Pistorius ('n inspirerende produktiewe kwilter wat die mooiste kwilts maak, vinnig dog uiters akkuraat) het my voor die uitdaging gestel om 3 half voltooide kwilts te voltooi voor ek aan 'n nuwe kwilt mag werk. Ek noem dit 3 vir 1 Uitdaging)

Ek het besluit dat ek hierdie projek beter moet dokumenteer. In 2008 het ek fotos van al my halfklaar goed geneem en 'n boekie daarvan gemaak. Dit het nogal gehelp om te weet waaraan ek werk en waaraan ek moet werk. Die foto papier is duur en die ink van mens se huis drukker ook. Ek vind toe n program van ORMS op die internet waar mens 'n 28 bladsy sagte band boek kan laat druk vir R280. Jy laai die foto's op, die program het n verskeidenheid bladsy opsies en mens kan 'n enkel foto of 4-5 fotos per bladsy plaas.

Dit was n groot taak om al die half voltooide projekte van die verskillende bêreplekke te kry om foto's te neem. Ek het nie probeer om vreeslike kwaliteit foto's te neem nie, as die kwilt voltooi is sal ek n beter foto  neem. Nadat ek die boek van die drukkers gekry het, het ek al die kwilts genommer. Ek het ook nog ,n klomp half klaar projekte in ander houers en plekke ontdek en die getal half voltooide goed staan op 90. (Ek is nie trots hier op nie)

As ek die dag hierdie 90 voltooi het, sou ek ook 30 nuwe goed kon aanpak. As daardie 30 voltooi is, sal ek nog 10 kan aan pak en met daardie 10 voltooi nog 3 en uit eindelik nog een. Hierdie projek sal dus by voltooing 'n totaal van 134 voltooide kwilts op lewer. Ek het nie 'n tyd skedule hieraan gekoppel nie. My dryfveer is die nuwe kwilts wat ek wil aan pak en die grootste struikel blok is om die self dissipline aan die dag te lê om nie nuwe projekte te begin voor 3 ou goed nie voltooi is nie.

 By die Nasionale fees in KZN het ons n kwilt joernaal boekie gekry. Ek skryf nou ook hierin soos ek aan 'n projek werk en plak foto's in. Ek hou daarvan om my kwilt projekte te dokumenteer- dit is een van die hoof redes vir my blog, dat dit soos 'n dagboek van my kwilt projekte is. (Natuurlik sal ek dan ook meer gereeld moet blog- wat ook een van my nuwejaars voornemens is. Ek het 'n plan om dit reg te kry- sal later daaroor gesels)

Dit is alles baie motiverend en ek werk getrou en met 'n plan aan my projekte. Ek het Desember 2018 met die uitdaging begin en reeds 8 projekte voltooi.

Ek hoop jou 2019 het ook lekker uitdagings en goeie voornemens om dit aan te pak. Kom ons kyk wat ons hierdie jaar kan uitrig!

Alles wat mooi is.

Marié

Sunday, October 7, 2018

Om oor te begin

Vanjaar het nuwe uitdagings aan my gestel. Ek woon nou op Melkbos - alleen. Twee van my kinders en skoonseun is nou by die boerdery betrokke. Ek moes uit my huis skuif na 'n ongemaklike woonstel en het verkies om see toe te kom. Na 8 maande het ek die moeilike aanpassing gemaak, myself tuis gemaak en 'n nuwe naaldwerkkamer ingerig.



My kasbouers in aksie

Ek begin my materiaal in pak
Om 'n plek vir elke ding te vind en elke ding op sy plek te kry is nog 'n proses. Ek het nuwe kaste in my naaldwerkkamer laat inbou. Ek wil nog rakke teen die mure laat oprig en ook werk blaaie vir my masjiene laat insit. My Simply Sixteen is ingeruil op die Amara en dit pas net-net in. Ek verskuif nog elke nou en dan iets en dit sal nog n rukkie neem voor alles in my Naaldwerkkamer heeltemal funksioneel is. Daar is nog n tafel wat moet uit en deur 'n "workbench" vervang moet word, wat nog op die plaas is. Daarvoor moet ek wag vir die regte geleentheid en hulp van my kinders.

Tussendeur is ek betrokke by die organisasie van ons Good Hope Quilters Gilde se wegbreek (wat Fynbos genoem word) in die Oktober vakansie. Ek is ook aan die stuur van sake vir die 2021 Nasionale kwiltfees wat ons ook in Stellenbosch wil aanbied.

Aangesien ek nou nader aan die Kaap is kan ek ook weer laslapklasse gee. Ek het 'n beginner klas asook 'n kursus waarin basiese eenhede gelas word, by Thimbles die laslap winkel in Durbanville aangebied.

Sunday, March 26, 2017

'n Plan is nie genoeg nie

My 60 projek het bietjie vas geval. Ek kan nog geen voltooide produk rapporteer nie! Ek is veronderstel om een kwilt 'n week klaar te hê as ek my 60 projek suksesvol wil uitvoer. Wat my die afgelope maand in die wiele gery het, was hoofsaaklik 2 goed.

Die een is ou slegte gewoontes. Na my oggend swem en ontbyt sak ek voor my rekenaar in, deurentyd antwoord ek emails (ja dit moet gedoen word) besoek ek gou die "links" wat ek kry en lees bietjie Moneyweb. Dan doen ek bietjie admin en herhaal die proses deur weer emails na te gaan. Voor ek weet is die oggend om en niks het op die kwilt front gebeur nie.

Die tweede probleem is 'n doelwit en 'n plan is nie voldoende nie. Die plan moet meer detail bevat. Een kwilt 'n week gebeur nie van self nie. Ek het begin om vir myself te sê dat vir die handwerk projek waar aan ek werk ek daagliks een ster moet voltooi. So "ek is te moeg vanaand" is nie meer n geldige verskoning nie. As ek net eers aan die werk kom voltooi ek sommer twee so ek het al 'n mooi oes.


Die kwilt op die raam wat ek al verlede maand by Boland gilde gaan wys het, kom ook nie klaar nie. Deels omdat ek telkens nog iets wil by kwilt (dit sal net beter werk om ook daar te "ditch" en hier nog iets in die agtergrond te kwilt) en deels omdat ek so selde gaan kwilt.

My naaldwerk kamer was so vol en deur mekaar met halwe projekte wat oral rond staan. Ek kon beswaarlik op my snyplank sny want die boonste helfte was vol allerlei lappe en later ook die regter helfte. Ek kon ook nie behoorlik stryk nie want dieselfde deur mekaar spul was op my lekker ekstra groot strykplank. Dan was halfklaar blokkies van my Dear Jane projek ook oral so ek kon nie begin opruim voor ek nie daarmee 'n plan gemaak het nie.

Verlede Donderdag het ek en Rita 'n klas in Villiersdorp by Marinda gaan bywoon en het ek tuis gekom met n nuwe projek in die begin stadium, 'n sak vol scrap lappe en 'n deur mekaar eetkamer tafel waarop ek alles afgepak het. Dit was die keerpunt.

'n Groot reg pak aksie het begin maar tussen deur het ek ook my detail plan in werking gestel. Die detail plan moet ek nog verder verfyn maar op die oomblik behels dit dat ek elke dag op die langarm masjien moet werk al is dit net vir 10 minute. Dit het reeds vrugte af gewerp want my Tribute to Sue is van die raam af en my volgende projek is op die raam gereed vir die eerste stiksels.


Ek moet ook elke dag in my naaldwerk kamer kom. Ek maak nou gou klaar met my rekenaar werkies en gaan dan dadelik naaldwerk kamer toe. Ek werk op die oomblik aan drie kwilts (nuwes) wat ook my klas voorbeelde is. (Ek het so n paar beginners in 'n kursus wat ek op Moorreesburg aanbied).

By Boland gilde het ons n jaar projek waar ons aan New York Beauty gaan werk. Ek wou al lankal Karen Stone se Ginko de Mayo aanpak en dit was nou goeie motivering. Dit het my so 'n dag voor die rekenaar gekos om al die patrone in my EQ 7 program uit te druk. Ek maak my blokke 36 cm en daar moet 36 blokke gemaak word. Die eerste een is klaar. (Het ek gesê ek gaan net ou goed klaar maak vir my 60 projek?- dan is dit n misverstand. Ek het lankal gesien dat nuwe projekte my energie gee. As ek net aan ou goed moet werk sal ek werklik niks uit gerig kry nie.)

Dinsdag het ek my eetkamertafel uit sorteer, goed in 'n kas wat ek nie gebruik nie verskuif sodat die goed wat ek nodig het netjies gestoor kan word en 'n werkstasie op die sytafel langs Bagel die Marmot ingerig. Gister was dit my naaldwerk kamer se beurt. My werkstafel is skoon met alles wat daarop was weg gepak nie net verskuif nie. So ook met die strykplank. Nou kan ek die binding aan my groot kwilt speld (een van die redes waarom ek vir my so n groot stryk blad gemaak het) en het ook lekker plek gehad om die kwilttop en agterkant wat ek op die raam gesit het, mooi voor te berei.

As ek dit nou reg kry om al drie goed op een dag te doen kan ek n kruis op die almanak trek. My doelwit is om elke dag so 'n kruis te kan trek om n aaneenlopende ketting te vorm. Na twee dae waarin ek reeds suksesvol is, het die volgende vir my duidelik geword. Dit help nie om 'n versugting te hê soos: Ek wil graag al my UFO's klaar maak nie. Dit help ook nie as dit 'n doelwit of selfs 'n plan word nie. Die plan het detail soos wanneer, hoe dikwels en wat,  nodig.

Ek gaan nou vir elke week vooruit beplan en dan sorg dat ek in my naaldwerkkamer en by my langarm masjien uit kom op 'n daaglikse basis! Laat ons sien of dit werk!

Alles wat mooi is

Marié

Tuesday, February 21, 2017

My 60 Projek

Ek vertel nou die dag van my 60 projek- ek wil in 60 baaie (see) en 60 Riviere/damme/strandmere swem in die 2 jaar rondom my 60 ste verjaardag(die jaar Junie). Antionette vra toe en waarom nie ook 60 kwilts maak nie? Hierdie uitdaging kan ek nie net daar los nie. Dalk is dit net wat ek nodig het om myself gerat te kry om al hierdie half klaar goed klaar te maak.
Ek hou so baie van die stuk werk- weet nie waarom ek dit nie voltooi het nie?

Julle het tog nie gedink ek kan 60 nuwe goed begin en klaar maak nie- daar is nog net 15 maande oor. Dit beteken 4 kwilts n maand. Ek wou al lankal n lys maak van al die halfklaar goed. Ek het nou lyste (ek sit die handlas goed apart van die ander en het n lys vir 2016 en 17 goed) en ek tel 56 kwilts wat DIC (delayed in construction) en UFO status het. (Daar is nog in n ander kas en houer so ek is reeds oor 60) Die meeste se tops is klaar- hier en daar kort een 'n border.
Dit was n klas voorbeeld en verdien om voltooi te word

So dis hoe ek die uitdaging gaan beantwoord. Vir die kwilt om in aan merking te kom moet dit van 10 Junie 2016 tot 9 Junie 2018 voltooi word. Dit moet n "label" aan hê en as dit n muurbehangsel is ook die "sleeve" vas gewerk, reg om te hang. Dit moet dus heeltemal klaar wees. Ek het 3 verlede jaar voltooi so julle kan sien ek sal baie meer produktief moet raak om die uitdaging te kan uitvoer.
Hier is een van die voltooide kwilts- ek het in 1989 daarmee begin en September 2016 voltooi

Ek sou nie die uitdaging kon aanpak as ek nie n langarm masjien (Handi Quilter) gehad het nie. Ek dink mens spandeer 80 % van jou tyd om die kwilt in die regte poesisie te trek as jy op n gewone masjien kwilt. Daarom is kwiltwerk op die langarm soveel gouer. Dit is natuurlik ook relatief- hoe groter die kwilt hoe langer neem dit.

Alvorens ek by die kwiltwerk kan kom is daar heelwat voorbereiding aan die meeste van die halfklaar goed. Ek sal hier op my blog vir julle op hoogte hou hoe ek vorder, so laat ek aan die werk spring!

Alles wat mooi is,
Marié